Debuutdigbundel · einde November 2026
Gedigte oor verlies en ontnugtering, soeke en gewaarwording—teen die agtergrond van sand en see en die ooptes van hierdie land wat ek liefhet.
kom staan in die oop kosyn
’n oop hand
hallo leser
jy's uiteindelik saam
met my op die blad
sien jy?
hier word nie opwaarts gepleit
soos met gebede nie
maar afwaarts getrap
die diep verlang in
Uit hallo leser
01 / die bundel
soos die kraai vlieg is ’n debuutbundel oor oorsprong, verlies, twyfel en herinnering; oor die woestynlandskap en my poging om myself daarin te lees.
Die gedigte beweeg tussen die persoonlike en die argetipiese. Hulle rebelleer en aanvaar. Hulle konfronteer leemtes sonder om dit te probeer vul. Hulle poog om die donker van naderby te beskou sonder om lig daarop te werp.
soos die kraai vlieg verskyn einde November 2026 by Turksvy Publikasies. Bestelbesonderhede volg binnekort.
johan@johan-s.com02 / lees
’n Voorlopige keuse uit die manuskrip.
die woestyn het ’n manier
om dinge te begrawe
dorpe ook
onder swakopmund
’n ouer dorp
onder die soutpad
spore van waens en swerwers
en in die see wrakke
wat besig is om hul name te verloor
maar dis saans as die mis inkom
en die ligte dof raak
ruik die dorp
na iets ouer
so asof die skedelkus
self probeer onthou
soos ’n kampdraad
langs ’n grondpad
iets wat tegelykertyd
skei en wys
of dalk
die stilte voor
die vaas val
die oomblik
wat lig
van donker
sinmaak
ek bid dan dat jy
die glas teen jou vel
sal voel skuur
die yster se koue
in jou murg sal intrek
want dit is die wit
van my bors
en die swart van my kop
hier vir jou agtergelaat
slotfragment
03 / bekendstellings
Drie intieme geleenthede word beplan—elk ’n eie ingang tot die bundel, met voorlesings, gesprek en wyn.
Datums en lokale word binnekort aangekondig.
04 / oor johan
Johan Swanepoel woon in Swakopmund, waar sand en see voortdurend aan hom en die dorp skaaf. Hy is ’n regsgeleerde, eggenoot en pa. Hy het ’n besondere voorliefde vir uitdagings wat uithouvermoë vra en klim ook nou en dan ’n berg. Poësie is die plek waar sy wêrelde ontmoet en dikwels met mekaar in konflik tree.
soos die kraai vlieg is sy eerste bundel.
“maar ’n oop hand
wat keer op keer bly uitreik”
terug na bo